يوميات رايقة وجوانى

السلام عليكم ورحمة الله وبركاته
دى اول مشاركة ليا فى القسم ده
وحبيت اجيب قصة يا رب تعجبكم

الحلقه الاول
الحادثة
الاسماء غريبه شويه بس الابطال هو اللى فرضو الاسماء دى نتعرف على الابطال الانسه رايقه بنت كول ومتخرجه من احدى الجامعات الخاصه بتحب الخروج والفسح والاجازات اما سبب الاسم انه اسم جدتها الاستاذ جوانى شاب من الجزائر الجوانى كلاسيك جدا صريح متخرج من كليه الحقوق جامعه اسيوط وبيشتغل محامى وعايش فى مصر مع الحاجه ام جوانى واخواته
الست رايقه متعوده كل يوم تخرج تروح النادى او تعمل شوبنج مع اصحابها وفى يوم وهى خارجه بعربيتها وسايقه وكلها انسجام مع شريط تامر حسنى الجديد عدى من قدام العربيه قطه صغننه رايقه فرملت فجاه طاااااااااخ دى العربيه اللى وراها نزلت بسرعه كانت القطه جريت بس اللى كان وراها الاستاذ جوانى وراح شاخط فيها وقال : هو انت معندكيش نظر خالص يامودام ؟
رايقه : سو سورى بس كان فى كات عدت وانا كنت هعمل حادثه
جوانى فاتح بقه : ايه ؟
رايقه : بس الحمد الله هى بخير
جوانى : بس انا مشفتيش اى حد معدى قدام العربيه
رايقه بعصبيه : بقولك الكات عديت من قدامى وكنت هدوسها
جوانى بنفاذ صبر : ياستى انا مش فاهم منك حاجه هو مين اللى داس على مين
رايقه : اتس اوك
جوانى : كمان بتغلطى فيه انا الحج عليه انا بكلمك بالذوق
رايقه : انت عايز ايه ادفعلك تمن العربيه
جوانى بشهامه : انا مجبليش العوض يامودام
رايقه : انسه بليز
جوانى : ياحول ولا قوه الا بالله اتكلى على الله يامدام
رايقه تركب عربيتها وتمشى سايبه جوانى بنص عربيته مكسرة ومش عارف يعمل ايه .
جوانى : هو انا اصطبحت بوش مين النهارده مفيش غيره عم مرزوق البواب وشه دائما مش بيخيب الحمد الله انى لسه عايش قعد جوانى يدور حوالين العربيه على اى سبب للحادثه وفى الاخر قال صحيح حريم مجنونه مفيش اى خواجه ولا اجنبى متعور اومال مين كات ده ؟؟؟؟
جوانى روح البيت لقى الحاجه قاعده وبتقوله
الحاجه : جوانى ياولدى لازم تتجوز ؟
جوانى : هو انا قولت لا بس انتى عارف ياامى انت البنات اليومين دول حالهم مائل
الحاجه : عندى ليكى عروسه مال وجمال بكره نروح نشوفها
جوانى فى عقله : هو انا قاعد على قلبك يشكرا فحت ردمجه وبعدين كل العرائس اللى تبعك الصلاحيه بتاعتهم انتهيت من زمان بس طاعه الام واجبه حاضر يشكرا فحت ردمجه
رجع جوانى منش غله تانى يوم ولبس البدله الحكلى اللى بيتفائل بيها ( عمره ماراح يخطب عروسه بيها والموضوع فلح ) وعلبه الشيكولاته من نفس المحل واخد الحاجه ام جوانى واتجاه الى بيت العروسه ....................... نكمل الحلقه الجايه

ههههههههه دمها خفيف ومنتظرين المزيد جوانى ده بيفكرنى بكتكوت هههههههه

هههههههههههههههههه
جميلة وعندى احساس ان العروسة هى رايقة

كويس ومنتظرين المزيد
بس رايقة دى واضح انها ترفع الضغط

شكرا على الردود الجميلة

[b]الكتابه
الحلقة التانيه
العروسة
استعد جوانى للقاء العروسه واستلف عربيه واحد صحبه علشان عربيه بتتصلح بعد حادثته الاولى مع رايقه وقال فى عقله اهو العربيه موديل جديد وبرده منظر قدام اهل العروسه لبس جوانى البدله الكحولى وخد علبه الشيكولاته تحت دراعه وبينادى على الحاجه
جوانى : يشكرا فحت ردمجه ام جوانى اتاخرنا ؟
الحاجه : حاضر يابنى على مهللك شويه خلاص لبسنا انا وابوك اهو
جوانى : هو الحاج جاى معانا يادى الهنا شكل كلام الحاجه عن العروسه مع الحج شجعه بركاتك ياام جوانى .
جوانى ركب العربيه وقبل ما يدوس بنزين
الحاج ابو جوانى : بقولك ياولدى عدلنا على ايه فكهانى مش هندخل على الناس فاضين
جوانى : فاكهه ايه بس يشكرا فحت ردمجه احنا رايجين نزور مريض ما انا جايب علبه الشكولاته ؟
الحاج : شكولاته ايه بس انت عايز الناس تاكل وشنا ولا ايه وكمان عدى على البقال نجيب كام كليو سكر وازازتين شربات ؟
جوانى : ولازمته ايه الشربات خليه فى الخطوبه ؟
الحاج : انت متفهميش فى الاصول اسمع الكلام والا مش هنروح
جوانى فى عقله من غير كلام : يعنى لازمته ايه فدان الفاكه وكمان الشربات افرض العروسه طلعت مش اد كده ليه الغرامات دى يشكرا فحت ردمج
بس خلاص الحج امر ومحديش يقدر يعانده نهايته عبينا العربيه فاكهه وسكر وفضلت انا حاضن علبه الشيكولاته وقلبي بيتقطع على فدان الفاكهه والسكر والشرابات وقعدت افكر ياترى العروسه شكلها ايه اكيد حلوه والا الحج ابو جوانى مكنيش اتحمس اوى كده يمكن شبه نانسى عجرم انا اول ما هشوفها هركز اوى وهمسك من ايدها صينه العصير علشان تقول عليها راجل زوق وكمان ....................طاااااااااااااخ فاق جوانى على الصوت ده والعربيه اترجت نزل جوانى من العربيه ولقى واحده واقفه قدامه بتقوله
الانسه : are you blind ? (أعمى)
جوانى : بص وراه علشان يشوف التالت اللى هى بتكلمه مالقاش غيره قالها انا اسف يامدام ؟
الانسه : انت تانى اللى اتخانقت معايا علشان الكات ؟
جوانى : اه انتى بتاعت الخواجه كات على فكرة يامدام انا مالقتيش اى حد متعور بعد ما انتى مشيتى بطلو الحاجات اللى بتشربوها دى
رايقه : انا لا يمكن تكون human ؟(بنى ادم )
جوانى : ياستى بطلى غلط
رايقه : بصت فى عربيته لقت راجل وست كبار فسالته المهم are them ok ؟ ( اللى معاك بخير )؟
جوانى : لف وركب العربيبه ودورها وهو ماشى طلع دماغه بره الشباك وقال انا قولت انك بنت ناس برده وهتقولى اوك حصل خير الف سلامه
رايقه جالها ذهول وقعدت تبص على عربيه جوانى وهى بتبعد وفانوس عربيتها مكسور .
جوانى وصل بيت العروسه وقعد يدور على البواب علشان يشيل الحاجات معاه لكن من أمتى بتلاقى البواب لما تكون محتاجه شال جوانى كل الحاجات على قلبه وطلع بيها 5 ادوار على رجله واول ما ضرب الجرس والباب اتفتح
ابو العروسه : اهلا وسهلا ايه النور ده
جوانى : اهلا بيك ممكن ادخل بقا
ودخل الحج والحاجه ام جوانى وقعدو فى الصالون
ام العروسه : نورتنا انتم والحج والعريس ماشاء الله عليه
الحج : اومال فين العروسه ياجماعه
ابو العروسه : كنا عايزين نستاذنك ياحج العريس والحج بس يجو معانا
الحج ابو جوانى : على فين هتروح تجيبو العروسه من مكان ؟
ابو العروسه : لا ياحج العروسه موجودة بس اصلها منقبه فا العريس يشوفها وان شاء الله يحصل قبول
الحج ابو جوانى : وانا مش هشوف عروسه ابنى يعنى
ابو العروسه : ياحج هتشوفها ان شاء الله بعد كتب الكتاب
ابو جوانى : هو انا لما اشوف بنتك هتنقص حته
ابو العروسه : ياحج ميصحيش الكلام ده دى عودينا
ابو جوانى : بعصبيه يعنى عايز تقول ان جانبك والعروسه قرفنين من ابو العروسه
قوم يابنى الجواز دى مش بتاعتنا
جوانى : ياحج الصبر بس نفهم
ابو جوانى : ابدا والله ما يكون ابدا
جوانى فى عقله وهو خلاص هيعيط : ابوس ايدك ياحج احنا حتى مااعتدناش بتمن فدان الفاكهه طيب حتى اشوفها ومش اتجوزها عااااااااااااااااااااااااااا
ابو جوانى ساب المكان وقام ووراه جوانى وهو فى حاله ذهول هو وامه وروحو البيت وجوانى بيقول ياعروسه ماتمت ..................... نشوفكم الحلقة الجايه
[/b]

ههههههههههههههههههههههه
جميلة وكملى يا اماندا

قصه حلوه
وعايزين باقى الحلقات

ههههه دول شويه كتكيت ووقعوا فى بعض ههههههههه

كملى

طبعا شكر خاص جدا لكل المتابعين للموضوع واتمنى تكون الحلقه التانيه تكون عجبتكم زى الحلقه الاولى ونبتدى على طول الحلقة التالته :-

الحلقة الثالثه
اللقاء الأول
طبعا ياجماعه جوانى بعد الحلقه اللى فاتت جاله اكتئاب شديد ده طبعا بالاضافه الى جفاف شديد فى الفلوس لكنه اقنع نفسه انه مكنيش فى ايديه اى حاجه يعملها وقرر يتابع حياته ويروح شغله نزل من بيته واخد عربيته من عند الميكانيكى واتجاه الى مكتب الاستاذ عز الدين الدبابانى اللى بيشتغل عنده محامى .
جوانى دخل مكتبه ويادوب لسه هيقعد على مكتبه ويضرب كوبايه الحبر بتاعت الاصطباحه وجاله عم متولى الساعى وقال الاستاذ عايزاك فى مكتبه ياجوانى بيه جوانى قام وهو بيقول يارب خير انا معمليتش لسه اى حاجه ماهو اليوم باين من اول
دخل جوانى من الباب لقى واحده قاعده مع الاستاذ اول ما دخل التفتت راح جوانى زى الصاروخ
قال : انتى رجعتى فى كلامك ولا ايه وهتخلينى اغير رايي ؟
رايقة : هو انت ادتنى فرصه اصلا يااستاذ انا يادوب بسالك الناس اللى معاك بخير سبتنى ومشيت
جوانى : انتى قولتى اوك ؟
رايقه : هو انت بتسمع كلمه واحده بس
الاستاذ عز : خير ياجماعه فى ايه ده انتم لسه مش اتعرفتو على بعض
رايقه : انا عارفاه كويس ده اللى كنت لسه بحكيلك عنه اللى خبط عربيتى وجري
الاستاذ عز : اعرفك بقا ده الاستاذ / جوانى من اشطر المحامين اللى عندى
رايقه : واضح اوى شاطر فى الزوغان
جوانى فى عقل : ياصبر ايووووووووووب
الاستاذ / عز : الانسه رايقة والدها من اكبر رجال الاعمال وكانت جايه علشان قضيه صغيره كده بتاعت ورث عن والدتها
جوانى : خير ان شاء الله
أ / عز : اتفضلى ياانسه رايقه مع الاستاذ جوانى وهو هيقوم باللازم

راح جوانى مع رايقه على مكتبه وابتدى الكلام
رايقه : القضيه بتاعتى ان والدتى الله يرحمها سابت عمارة باسمها هى واخواتها واخواتها رافضين يدونى نصيبى منها بدعوى ان ماما باعت نصيبها لكن مفيش اثبات مش عارفه اعمل ايه
جوانى : انتى ليكى اخوات
رايقه : لا
جوانى انا هحتاج منك شويه اوراق تعديهم عليه بكره علشان ابتدى اشتغل
رايقه : اوك يااستاذ جيرجاوى
جوانى : اسمى جوانى ياانسه
ومشيت رايقه على وعد انها هترجع تانى تجيب الاوراق واخدت رقم موبيل جوانى وهو اخد رقمها وعدى يومين وهى مظهريتش فقرر جوانى يتصل يسالها على الاوراق
جوانى : الو ازيك يااستاذة رايقه انا جوانى المحامى
رايقه : جيرانى المحامى مين
جوانى : ياستى جوانى بتاع قضيه عمارة والدتك
رايقه : اه اهلا خير
جوانى : فين الاوراق علشان نرفع القضيه
رايقه : نسيت الموضوع ده خالص ممكن تقبلنى وادهالك
جوانى هستنناكى فى المكتب
رايقه : مش هقدر اجى المكتب
جوانى : اومال فين
رايقه : تعرف كلومبوس
جوانى : حد فى العالم ميعرفوش
رايقه : فى العالم
جوانى : طبعا كريستوفر كلومبوس بتاع الامريكتين
رايقه : يااستاذ كوفى شوب كلومبوس
جوانى : يعنى ايه
رايقه : ده مكان الناس بتقعد فيه
جوانى : عنوانه
رايقه : فى المهندسين
جوانى : طيب حاضر
قعد جوانى يلف على كلومبوس لحد ما لقاه دخل جوه الكوفى شوب وقعد بيص حواليه لقى ناس 90% منهم شاب صغير وبنات وقعد يقول لنفسه عايزه تقابلنى فى كازينو شكل البت اتكعبلت فيك يامعلم بس انت خليك تقيل واوعى تتدلق ولازم تبين ليها انك فيس وكريم كده قطع حبل افكاره دخول رايقه المكان
جوانى بصوت يسمع الميتين وسط المكان : انا هنا يارايقه

رايقه محرجه راحت ناحيه التربيزه وقعدت
جوانى قبل ما تفتح بقها راح مصقف كانه قاعد فى مسرح العرائس ونادى انت ياجرسون
رايقه : انت قاعد عند كبابجى ؟؟؟؟؟؟؟؟؟
جوانى : اومال هنطلب المشاريب ازاى
رايقه : تشاور بس والويتر هيجى
جوانى : ما انت مقولتيش انه بادارة صم وبكم مكنيش اعرف
رايقه : ارحمنى الاصول هنا كده

جه الويتر ومعاه المينو واد لرايقه وجوانى ومشى
جوانى بنفس الصوت : انت رايح فين انت بتوزع كتب فى اتوبيس
رايقه بصت بصه ناريه لجوانى خليته ببلع لسانه وسكت
رايقه : تشرب ايه
جوانى : لو ممكن قهوه زياده بوش
رايقه : جرب الاكسبرسو هتعجبك
جوانى : بس انا مش جعان
رايقه وخلاص هتتشل : دى قهوه برده

جوانى وهو حاسس بالغباء : اللى تشوفيه
شربو القهوه واديته الاوراق اللى طلبها وهى كانت قاعده ساكته زى ما يكون فى ميت وجوانى يخاف يتكلم احسن يعك وبعد 3 دقائق قولتله انا همشى راح جوانى رافع صباعه عالى اوى
رايقه : مالك انت عامل زى تمثال الحريه كده ليه
جوانى : بنادى الجرسون علشان ندفع الحساب
رايقه : حسبى الله ونعم الوكيل
جوانى : قرأ الشيك لاقى فيه 30 جنية فى 2 قهوه راح وشه احمر ولسه هيزعق ويقول انتم فاكرنى هندى ولا راكن الفيل بره افتكر انه قدام رايقه وشكله هيكون وحش اوى دفع الفلوس اللى معاه ونزل مع رايقه من غير ولا كلمه لكن فى عقله كان بيقول انا غلطان انى شربت حاجه معرفهاش ياخسارة فلوسك ياابن المعلم صميده عااااااااااااااااااااااااااااااااااااا ............... نشكوفكم الحلقة الجاية .

ههههههههههههههههههههههههههههههه
والله بجد جامدة جدا خصوصا((انتم فاكرنى هندى ولا راكن الفيل بره))
هههههههههههههههه

ههههههههههههههههههههههههههههه
بجد والله جميلة جدا بس يا ريت الحلقة تبقى اطول من كدة
وشكرا لمجهودك

هههههههه جامده والله جوانى ده شكله اثرى تحفه ههههههه

شكرا على الردود والمتابعة

الحلقة الرابعة

الفطار

رايقه لما روحت بعد فضيحه كلومبوس حست انها كانت قاسيه معاه جدا وانه انسان طيب وواضح ان علاقته بالدنيا محدوده فعدت تفكر ازاى تعتذر عن طريقتها معاه بس من غير ما تقول انا اسفه فقررت تتصل بيه
رايقه : صباح الخير يااستاذ جرجاوى
جوانى : ياستى جوانى ده سهل اوى
رايقه : معاليش ياسيدى المهم انت اخبارك ايه
جوانى : الحمد الله وكويس انك اتصلتى انا كنت لسه هتصل بيكى علشان تيجى معايا الشهر العقاري بكرة علشان تعمللى توكيل علشان نبدا فى اجراءات القضيه
رايقة : اوك الساعه كام ؟
جوانى : الساعه 9 الصبح علشان عندى قضيه الساعه 10.30 يادوب الحقها
رايقه : نتقابل عند الشهر العقاري الساعه 9
رايقه طبعا معجزه انها تصحى بدرى كده بس محبتش تعمل مشاكل تانيه مع جوانى واتقبلو عن الشهر العقارى
رايقه : good morning ( صباح الخير )
جوانى : بصلها شويه وحاول ميبنش انه مش فاهم وقالها طبعا انا على طول مواعيدى مظبوطه صباح الخير
رايقه : يلا بينا
دخل رايقه وجوانى على المكتب وخلصو التوكيل
جوانى : انا هسيبك بقا علشان الحق المحمكه
رايقه : ينفع اجى معاك وبعد المحكمه اعزمك على الفطار
جوانى : هو النهارده صيام انا معرفيش وبعدين احنا فين والمغرب فين
رايقه : ياسيدى الفطار اللى الناس بتاكله الصبح
جوانى : قصدك الفطور
رايقه : هتفرق يعنى
جوانى : طبعا وعلى العموم انا اللى عزمك على فطور عمرك ما هتنسيه ابدا ?
اتجه رايقه وجوانى للمحكمه وقعدت رايقه فى القاعه وكان فى زحمه جامده جدا ودخل الحاجب وقال : محكمه
كل الناس سكتت وقامت وقفت ورايقه قعدة تتفرج زى ما تكون فى السينما
جوانى غمسها انها تقف فوقت وسالت جوانى
رايقة : هى الناس واقفت لما الراجل زاعق ليه هما خايفين ولا ايه ؟
جوانى : لا ياستى بعدين افهمك اسكتى دلوقتى
رايقه : اوك
الحاجب : قضيه رقم 1 الاستاذ حمدى مسعود ضد السيدة : عليه السيد
القاضى : الدفاع
جوانى : جوانى صميده حاضر عن المدعيه عليه السيد
القاضى : اتفضل يااستاذ
جوانى : ياسيادة القاضى احنا بنطلب الطلاق لان بشهادة الشهود ان الزوج رغم مكانته العلميه الا انه يضرب زوجته باستمرار
رايقه زى الصاروخ : انا لازم تعدمه يامستر ده مش تصرف جنتل مان انه يضرب مراته
القاضى : انتى مين ؟
رايقه بكل براءة وثقة : انا رايقه جايه هنا اتفرج
القاضى : هو انتى جايه المسرح ولا السينما اطلعى بره
رايقه : بس انا معمليتش حاجه
القاضى : هتطلعى بره ولا احبسك
رايقه قامت من مكانها ناحيه الباب وهى بتبص لجوانى وهو لا كانه شافها قبل كده
بعد 10 دقائق خرج جوانى من قاعه المحكمه وراح لرايقه لقها قاعده وبتقوله
رايقه : انت ازاى تسيب القاضى يخرجنى وانا بتفرج انت لازم تحبسه
جوانى : على اساس انى وزير ولا ظابط وبعدين احمدى ربنا انه خرجك بره محبسكيش
رايقه : يلا بينا على on the run to have breakfast?
جوانى : عموما فى صيدليه قريبه من هنا نعدى نجبلك اللى قولتى عليه ده ونروح نفطر معاكى الروشته علشان انا محفظتيش اسمه
رايقه بنفاذ صبر : ده مش دواء ده اسم مكان نفطر فين
جوانى : احنا اتفقنا انى انا اللى هفطرك
وانطلق جوانى بعربيته هو ورايقه الى السيدة زينب وجنب اشهر عربيه فول هناك وقف
رايقه : انت رايح فين
جوانى : اصبرى على رزقك
رجع جوانى ومعاك صنيه عليها طبقين فول وبيض مسلوق وبتجان مقلى و10 ارغفه عيش وطبعا البصل
رايقه : انا مستحيل اكل الاكل ده
جوانى : براحتك انا جعان ولسه هيضرب اول لقمه
رايقة : انا عايزه عصير اى حاجه canned
جوانى : يعنى ايه ??
رايقه : يعنى عصير متعرفيش العصير
نزل جوانى ورجع معاه كيس بلاستيك فيه عصير قصب وفيه شلموه
رايقه : ده ايه ده
جوانى : ده عصير قصب بالهنا والشفاء
رايقة فتحت باب العربيه ووقفت تاكسى وسابت جوانى واقف ماسك كيس العصير ومش فاهم ولا عارف هو عمل ايه زعلها كده .......................... نشوفكم الحلقة الجاية

بطلب منك طلب
ياريت تنزيلها كلها مرة واحدة
لسة هستنى الحلقات
اصل بصراحة القصة مشوقة جدا
مش قادر استنى دة عامل زى مسلسل مهند
هههههههههههههههه
استمرى

علاء الدين كتب:: بطلب منك طلب
ياريت تنزيلها كلها مرة واحدة
لسة هستنى الحلقات
اصل بصراحة القصة مشوقة جدا
مش قادر استنى دة عامل زى مسلسل مهند
هههههههههههههههه
استمرى

يابنى لو نزلتها مرة واحده هتلاقى محدش بيقراها للاخر لانها شكلها كبيره كده احسن بصراحه

ومستنيين المزيد

شكرا على مروركم
زى ما قال المهندس زملكاوى مينفعش أحطها كاملة

عادى احنا متابعين برضو
لو على تسعين حلقة

الحلقة الخامسه
البولينج
جوانى دائما حاسس انه مش قادر يكسب رايقه مع انه معجب بيها جدا وحاسس كمان انها عندها نفس الشعور بس كل لما يجى يعمل حاجه تبوظ منه مش عارف ليه وعلشان كده قرر ياخد راى واحد صاحبه علشان يعرف يتعامل ازاى معها علشان يكسبها ولما دور فى دماغه على صاحب مالقاش غيره ايهاب اللى معاه فى المكتب وكمان ايهاب خاطب وبيحب خطبيته جدا هو ده ياجوانى اللى ينفع
جوانى : صباح الخير ياايهاب
ايهاب : صباح الخير ياعم جوانى
جوانى : ازيك وازى جماعتك
ايهاب : جماعه ايه ؟
جوانى : خطبيتك ياايهاب
ايهاب : كويسه الحمد الله J مالك ياجوانى حاسس انك عايز تقول حاجه
جوانى : الصراحه انا معجب بواحده جدا بس حصلت شويه مواقف خلت الامور صعبه حبيتن
ايهاب : احكى
وحكى جوانى القصه كلها لصحه وايهاب عمال يضحك كانه بيسمع اسماعيل ياسين ولما جوانى خلص كلام سكت علشان يعرف راى ايهاب
ايهاب : ياراجل يامفترى حد عاقل يعمل كده
جوانى : انا عمرى فى حياتى ما كلمت بنت غير اخواتى وانت عارف الجزائر غير مصر .
ايهاب اولا انت لازم تنسيها العك اللى انت عكيته ده وتتصل تتعذر وتعزمها فى اى مكان هى تختاره مهما كان وتحاول تراقب الناس اللى حواليك وتتصرف زيهم
جوانى : حاضر اما اشوف اخرتها
جوانى : الو ازيك يااستاذه رايقه
رايقه باستغراب : الله يسلمك يااستاذ جوانى
جوانى بشجاعه :انا متاسف جدا على موقف العصير واتمنى متكونيش زعلانه
رايقه : لا ابدا no problem
جوانى : طيب انا كنت عايز اشوف حضرتك علشان نتاقش فى شويه نقط بخصوص القضيه
رايقه : انا النهارده رايحه العب بولينج ممكن نتقابل هناك الساعه 8 بالليل
جوانى : وده بتلعبيه فين
رايقه : مركز البولينج الدولى مدينه نصر
جوانى : اتفقنا
ايهاب : كده كويس جدا طبعا انت عارف البولينج ومظنيش هيكون فى مشكله
جوانى : طبعا طبعا
جوانى لبس البدله الحكلى اللى دائما وشها حلو عليه وراح نادى البولينج جه يدخل قالو لازم تذكرة
جوانى : ياسيدى انا مش داخل العب انا هقابل ناس بس
الامن : يااستاذ النظام هنا كده
جوانى : خلاص ياسيدى كام
الامن : 50 جنيه
جوانى : ليه هو انا هعلب مع المنتخب ولا حسن شحاته اللى هيلعب معايا دى سرقة
وابتدى جوانى يفقد اعصابه لكن وسط ده كله افتكر ان رايقه ممكن تكون جايه تشوفه كده هيبقى شكله نص كم خالص وقطع التذكرة ودخل وهو مش عارف المكان وكل اللى سمعه حاجات بتخبط فى بعض هما بيدربو على الحرب هنا ولا ايه المهم بمساعده اهل الخير جوا المركز دخل صاله اللعب وهو داخل وقفه شاب وسيم كده وقاله
الشاب : مساء الخير يافندم
جوانى : يسعد مساك
الشاب : حضرتك هتلعب صح
جوانى : طالما دفعنا ال50 جنيه هنلعب انشاله استغمايه
الشاب : اقلع الجزمه حضرتك
جوانى : نعم انت بتهزر
الشاب : يااافندم اقلع الجزمه وادهانى
جوانى : هو انتم هتمودنى على رجلى ولا ايه ولا رشين الارضيه
الشاب بنفاذ صبر : يااستاذ القواعد هنا كده اللى يدخل يدانا جزمته ويلبس الكوتشى ده
جوانى بص على الكوتشى لقاه كوتشى احمر برباط عادى
جوانى : انا عايز تاخد منى جزمه ب 150 جنيه وتدينى كوتشى باتا ب 25 جنيه وبعدين ده حريمى وجوانى ابن صميده راجل طول عمره
الشاب : يامحترم انت هتلعب بس بيه وانت خارج هتاخد جزمتك تانى
جوانى : طيب لما نشوف اخرتها
جوانى لبس الكوتشى على البدله شكله كان كوميدى جدا ودخل لقى رايقه مستنياه وبتبصله باستغراب كانه كائن فضائى
رايقه : انت لبس بدله ليه انت مش هتلعب
جوانى : وماله العب هى البدله هتقول لا
رايقه : على راحتك يلا بينا
جوانى :على فين احنا لسه معقدناش
رايقه : نلعب وبعدين نشوف موضوع القضيه
واتجاه رايقه وجوانى الى اللعب
رايقه : طبعا انت عارف البولينج ؟
جوانى بثقة وهو بيفتكر نصيحه ايهاب بص حواليك واعمل زيهم : طبعا طبعا
رايقه بمكر : طب اتفضل انت الاول
جوانى بص حواليه مالقاش اى حد بيلعب وبعدين ضرب بعنينه كده لقى صف كور مرصوصه راح جايب واحده ورافعها لقها تقيل اوى قالى فى عقله طيب دى لو شوطته برجلى هتكسر رجلى اثبت ياجوانى عايز رايقه تقول عليك خريع حط الكور ة على الارض ولسه هيشوط
رايقه : استنىىىىىىىىىىىىىىىىىىىىىىىى
جوانى : فى ايه ؟
رايقه : انت هتعمل ايه ؟
جوانى : هشوط الكورة بس انتى قوليلى فين الجون بتاعنا ؟
رايقه انت متاكد انك لعبت بولينج قبل كده
جوانى بثقه : طبعا انا متربى عليه
رايقه : البولينج بتحدف الكورة بايدك ناحيه الازازيز دى
جوانى حس باحباط فظيع وكمان الجهل وعلشان بنقذ الموقف قالها
جوانى : سبحان الله اللى عندنا فى الجزائر غير ده خالص كل بلد وليه علامه بقا
جوانى شال الكورة كانه شايل شوال دقيق وراح رازعها على الارض ناحيه الازازيز جريت الكورة ووقعت ازازه واحده جوانى فرح جدا وقعد ينطط كانه جاب جون فى ماتش امريكا ومصر وخد الكاس رايقه بصتله وقالت حسبى الله ونعم الوكيل مفيش فايددددددددددددده ................................. نشوفكم الحلقة الجاية

هههههههههههههههههههههه
جميلة اوى وكملى

جو اون
يعنى استمرى

شكرا على المرور

جميل جدا استمرى

صباح الخير والسعادة ويوم جديد مع رايقه وجوانى يارب يعجبكم

الحلقة السادسة

السينما

جوانى دايما حاسس بالذنب وانى الدنيا ملطشه معاه اوى مع انه عمل كل اللى عليه مش عارف يعمل ايه تانى كل ده دار فى عقل جوانى وهو رايح الشغل الصبح وداخل مكتبه وايهاب مستقبله بابتسامه عريضه وبيقوله .
ايهاب : tell me good news man ?
جوانى : انا مش هرد عليك علشان انت غرقتنى
ايهاب بدهشه : ليه هو حصل ايه ؟
جوانى ابتدى يحكى اللى حصل وايهاب فاتح بقه مذهول ولما جوانى خلاص كلامه
ايهاب : ايه ياراجل العك ده كله لما انت متعرفيش البواينج مسالتنيش ليه ؟
جوانى : ماهو انا الصراحه اتكسفت ولقيتك بتتكلم عنه كانه الكورة الشراب وكل واحد فى البلد عرفها مش هطلع انا اللى حمار يعنى
ايهاب : يعنى رايقه زعلت منك كالعادة
جوانى : مش عارف بس هى المرة مسبتنش ومشيت هى فضلت تحاول تعملنى البولينح لحد ما زهقت غالبا ووصلتها لحد عربيتها من غير ولا كلمه ومش عارف اعمل ايه
ايهاب : انا عندى فكرة كويسه بس انت تسمع كلامى اسمع بقا انا هنزل دلوقتى رايح المحكمه وهبعت ورد باسمك على عنوان بيتها واكتبلها كلمتين حلوين وميعاد تروحو فيه السينما اظن ده مكان مفهوش اى عك الساعه 9 كويس واحجز فى سينما جلاكسى كويسه واختار فيلم حلو كده
جوانى : هى فكرة مش بطاله حاضر
نزل ايهاب على محل الورد وكتب فى الكارت
صباح الخير على احلى ورد فى مصر انا اسف وعلشان اصالحك انا عزمك على فيلم النهارده فالسينما ايه رايك هتصل بيكى ؟
وبعت ايهاب الورد والميعاد واتصل بجوانى وقاله يتصل برايقه بعد نص ساعه ويقاولها كلمتين حلوين جوانى استنى نص ساعه واتصل برايقه
جوانى : صباح الخير يارايقه
رايقه : مرسى خالص على الورد والكلام الجميل ده انت هتخلينى اغير رايي فيك
جوانى : دى اقل حاجه لجمالك ياست الكل ويارب ننول الرضا
رايقه بضحكه خفيفه : كده بجد هغير رايي من رقتك دى ياترى هتفرجنى على فيلم ايه
جوانى احتار يقولها اختارى انتى ولا يكمل الجميل ويختار هو لكنه حسم موقفه وقالها
جوانى : الفيلم اللى القمر يقول عليه
رايقه : انا هتفرج على زوقك انت النهارده
جوانى : وانت تحت امر الملكه هستناكى الساعه 9 عند السينما
جوانى كان هيطير من الفرحه واتصل بايهاب وحكاله
ايهاب قاله : ابوس ايديك ياجوانى بلاش عك المرة دى
جوانى : عيب انا اتعلمت الدرس وبالله عليه ياايهاب احجز فى فيلم ايه احسن انا معلوماتى عن السينما ضعيفه جدا
ايهاب : عربى ولا اجنبى ؟
جوانى : مش عارف ياايهاب يااخويا
ايهاب : انا برده مش عارف ايه الافلام اللى موجوده فى السينما دى بص انت تروح هناك وتكلمنى تقولى على الافلام وانا اختارلك
جوانى : على بركه الله
جوانى روح البيت يتغدى ويريح شويه قبل معاده مع رايقه
ام جوانى : جوانى ياولدى عمالك النهارده فته كوارع تستاهل حنك
جوانى : تسلم يديك بس انا مش عايز اتقل فى الاكل ياامى عندى معاد مهم
ام جوانى : ياولدى قوم الاكل هيبرد
جوانى راح على الغدا وضرب طبق الفته المحترم مع الخل والتوم بقا ايه ودماغه تقلت بس عيب مش راضى ينام فاضل على ميعاد رايقه ساعه قوم خدلك دش والبس واتقيف ورح السينما وقعد يبص على الافلام واتصل بايهاب يقوله
جوانى : الهاتف الذى طلبته ربما يكون مغلق مش وقتك خالص
جوانى قرر يتصرف وراح على شباك التذاكر وطلع 30 جنيه
جوانى : تذكريتن وحياه ابوك لفيلم الاستاذ / كريم عبد العزيز
الراجل بيبص لل 30 جنيه كانهم اهانه : يااستاذ كمان 20 جنيه
جوانى : ليه ؟
الراجل : التذكره هنا الفرد 25 جنيه
جوانى : ليه يعنى هو انا هاخد ممثل فى جيبى وانا خارج
الراجل : هنا سينما درجه اولى
جوانى : يعنى ايه هو انا هركب القطر ولا البولمان
الراجل بنفاذ صبر : لما مش عاجب حضرتك اطلع من الصف
جوانى حس انه رقم 50 كتر معاه اوى والغرامات كترت جدا بس يعمل ايه رايقه فى الطريق وشكله هيكون وحش لو غير السينما
جوانى : هات تذكرتين ياسيدى
الراجل : تحبهم فين
جوانى : فى السينما اومال هاخدهم فى رغيف
الراجل : ياسيدى انهى صف
جوانى : هو انا لسه هقف فى صف تانى ما تخلصنى وانا هشوفك
الراجل زهق من جوانى : وحجزاله على مزاجه
جت رايقه من بعيد وهى فى كامل اناقتها ببادى احمر وبنطلون ابيض وشعر اسود ووش مبتسم اول ما جوانى شافها حس بإنبهار وقال فى باله امك دعيالك ياجوانى
جوانى : اهلا بالبدر اللى نور الدنيا
رايقه بخجل : thanks
جوانى : طبعا حجزت احلى فيلم
جوانى وهو داخل السينما ورايقه جنبه شاب بستظرف
الشاب : ياسيدى على الجمال لما يقع فى حته ابيض فى اسود
جوانى اتلفت للشاب
جوانى : انت بتستظرف ولا ايه ولسه هيمسكه من القميص طلع من وراه 4 اقل واحد فيهم يسد الباب جوانى حس ان اليوم مش بتاعه بس لو انسحب هيبقى شكله وحش اوى جمع شويه شجاعه وقال صاحبكم عايز يتربى ودى اخر كلمة قاله قبل مايشوف الوان الطيف كلها مرة واحده ... نشوفكم الحلقه الجايه

» يوميات شاب مصرى روش طحن