اشتغالات الشباب والبنات لبعض

اشتغالات الشباب و البنات لبعض
"إنتى البنت إللى فى خيالى نفس الشعر و نفس العينين و نفس الجسم و..." دى
أول جملة الولاد بيقولوها للبنات فى بداية إشتغالاتهم لبعض و طبعا بيكون
رد البنات "إنت فارس أحلامى ناقصك حصان و خوذة و تبقى صورة طبق الأصل
للواد إللى باحلم بيه" الحياة بتفضل طبيعية لمدة شهر تقريبا فى كل مقابلة
الولد بيحلق دقنه و بيمسح الجزمة و يغسل سنانه و يكوى هدومه و البنت بتسرح
شعرها و تحط ميك اب و بتلبس هدوم شيك و لكن بعد مرور الشهر إياه كل واحد
بيزهق من التانى .. الولد بيرجع للكورة و لعب الاستيميشن و قعدة القهوة و
البنت بترجع لصاحباتها و النميمة و الفرجة على التليفزيون و الرقص فى أوضة
النوم و بعد ما كان حاطط لها نغمة "قصاد عينى" بقى يحطلها نغمة "كلهم
بيقولوا كده فى الأول" ، السبب الحقيقى للمشاكل دى إن كل واحد بيزهق من
التمثيل على التانى و بيبدأ كل واحد يظهر على طبيعته ، الولد بقى بيتأخر
على معاده مع البنت ساعة و بيروح يلاقيها لسه ماجاتش و بينزل ضارب شعره
جيل و منعكشه و مربى ذقنه و البنت بتيجى لمه شعرها بتوكة و من غير ميك آب
.. و بعد ما كان بيشدلها الكرسى علشان تقعد بقى بينقى الكرسى النضيف و
يقعد عليه و بعد ما كانت بتصمم إنها تشرب أى حاجة على مزاجه مابقتش تشرب
غير قهوة سادة زى اليوم الإسود إللى مش هيعدى ، العيوب إللى كانت مستخبيه
كلها ورا التمثيل بتاع أول شهر حب بتظهر و كل واحد بيقول للتانى انه لازم
يتغير علشانه لو بيحبه بعد ما كان الواد بيقولها إنه عارف إن مشكلته انه
عصبى و هى ترد عليه مش مهم يا حبيبى أنا هاستحمل و مش هاستفزك و اول ما
يتنرفز عليها و شها بيتقلب و الدنيا بتضلم و بتتقمص شخصية منى زكى فى فيلم
خالتى فرنسا و هاتك يا ردح و الموضوع كتير بيتطور ليصل إلى إشتباك بالأيدى
و طبعا الولد مش هيسكت و البنت هاترجع رابطة عينيها و الولد هيرجع مجبس
رجله و بعدين هيرجعوا لبعض تانى ، و لو قعدوا فى المطعم ياكلوا و هو عارف
إنها مش بتحب الشطة مثلا هيدلق إزازة الشطة كلها فى الطبق إللى قدامها و
هيقولها علشان تتعودى لما نتجوز و طبعا علشان ما تحصلش إصابات زى الحادثة
إللى فاتت بتضطر تاكل و لو إتصلت به فى وقت متأخر فى البيت يقولها إقفلى
دلوقتى عاوز أنام كلمينى بكره و لو إتصل بيها على الموبايل تقوله بابا
قاعد معايا فى الأوضة و تقفل فى وشه السكة ، كل واحد بيكون مصمم إن التانى
يتغير علشان يقدروا يكملوا مع بعض و الرد الطبيعى بيكون أنا كده و عمرى ما
هاتغير عجبك على كده ماشى .. مش عاجبك كل واحد يروح لحاله ، المشكلة إن كل
واحد مش بيصارح إللى بيحبه بكل حاجة بيفتكر إنه لو قال الحقيقة الطرف
التانى هيقلبه ، لو بيحبوا بعض صحيح الإثنين هيستحملوا بس المشكلة إن ده
كله تمثيل فى تمثيل و لما بيزهقوا كل حاجة بتظهر على حقيقتها.

كلامك صح مية فى المية
لازم الواحد يتصرف على طبيعتة وهيلاقى البنت اللى تحبة على طبيعتة
زى فيلم طير انتا

ونعم امثالك ياعلاء
وياريت الناس تسمع كلامك وتفهمه كويس عشان المشاكل اللى بتحصل دى

abo salah كتب:: ونعم امثالك ياعلاء
وياريت الناس تسمع كلامك وتفهمه كويس عشان المشاكل اللى بتحصل دى

موضوع رائع يا عبدو

شكرا للمرور يا شباب وخلوا بالكم من الاشتغالات دى
لانها بتحصل مع ناس كتير

كلام جميل
بس بنات اليومين
دول املا دماغهم كلام
هتكسبهم

نااايس توبيك ياجميل

MAHMOUD SAYED كتب:: كلام جميل
بس بنات اليومين
دول املا دماغهم كلام
هتكسبهم

يا سلام
انا حاسس انى بكلم محمود منير هههههههههههه

توتا اكشن كتب:: نااايس توبيك ياجميل

Thanks

MAHMOUD SAYED كتب:: كلام جميل
بس بنات اليومين
دول املا دماغهم كلام
هتكسبهم

مقطع انت ام السمكة وام ديلها يا ابن الايه يا خطر انت
ههههههههههههههههه

طبعا محمود ده معدى انت مش فاكر ال................

nice topic ya booooood

thank u taha basha

فلة شمعة منورة

شكرا يا ميدو

» ظروف الشباب والبنات فى الجامعه