قصه مختلفه شويه

تذكير بمساهمة فاتح الموضوع :

البدايه:
مش فاكر اى حاجه قبل ما اقابلها, كل اللى فاكره ان اليوم بيعدى ومفيش فرق بينه وبين اللى قبله ولا حتى اللى بعده , كل حاجه شبه التانيه ملل اقوى من ملل المسلسلات التركى , ده اقوى من ملل قنوات ميلودى ذات نفسها.
بالرغم من صله القرابه , الا انى مكنش ليا تعامل مع حد , اصلا شباب العيله مش داخل فيهم , يبقى اكيد معرفش اصلا بنات العيله , المهم مره شوفتها عادى فى طريقى وعجبتنى , بس طبعا مش اخدت فى بالى لانى عارف انى غريب عن المكان ومفيش اى معنى لانى افكر فيها , كلها يوم او اتنين بالكتير و اروح بيتنا.
بس دى مكنتش الحقيقه , لان الفرح اللى انا كنت جى احضره شوفتها فيه ومش بس كده , لا دى طلعت احدى فتيات العائله الكريمه كمااااان , سيدى يا سيدى والله ولعبت معاك يا معلم "طبعا ده هبل لانها لا لعبت معايا ولا نيله" .
المهم كلها ساعه ولا حاجه وبدأت انتشر فى العيله زى الانفلونزا "العاديه طبعا ههههه " , كل ده علشان خاطر عيون الجميل واقول لنفسى اكيد وانا واقف مع ده هتكلمه او هيكلمها , لكن ولا الهوا ده انا حتى شكيت انهم عاملين مشاكل مع العيله علشان كده محدش بيتكلم معاها.
اخر ما جبت اخرى وعملت البدع قولت يا واد خليك ناصح وكفايه تعب , دى شكلها مشفره يا عم الحج , وعلشان تسلم بس عليها وتعرف اسمها او تقربلك ايه , اللهم انك ممكن تتشل على رأى احمد حلمى فى فيلم "ظرف طارق" , بالمناسبه فليم حلو ادخلو شوفوه فالسينما هههههه .. بهزر .. انا من عصركم مش من العصر الحجرى , المهم قعدت على اول كرسى قابلته وقولت انفد بجلدى علشان اروح بيتنا سليم ومش لازم اتعرف عليها هو انا هتجوزها , طب وفيها ايه لما اتجوزها هو حرام , صلى على النبى يا عم الحج جواز مين بلا نيله.
ايه داااااااااااااااا معقووووووووووول دى هيا !!!!! , الله ما هى بتتكلم اهى زى الناس , مش خارسه يعنى ايه ده ؟؟ دى واقفه مع الواد (...) قريبى , اما اروح اعمل اى مشهد من المشاهد اللى الرجاله بيحكولى عليها , ظبت نفسى ونفس عميق , وحلفت جوه سرى انى لازم اروح اتكلم وهى موجوده علشان اتأكد ان مفيش حركات جبن منى , اصل انا عارفنى اوى.هههههه
المهم دخلت على الريس وطبعا هو ريس كفايه انه بيتكلم معاها ,
انا: ايه يا معلم , مش ناوى تروح ولا ايه؟؟؟؟ "طبعا تجاهلتها علشان انا شاب تقيل"
هو: اروح ايه يا قمر؟؟؟ انا مش ورايا لا غسيل ولا طبيخ ... انت وراك حاجه ولا فى "لوك لوك" فى التيلفون وكلام من اللى بيدوب يا شقى
انا: لا يا عم والله "الله يحرقك هتبوظ كل حاجه مرتبلها "
كل الحكايه انى فصلت انت عارف السفر وكمان النهارده عمال اتعرف على ده وده ودى علشان العيله الوارمه بتاعتنا محسش انى لسه غريب فيها.
هو: ممممم ... سلامتك يا كبير.
بالسلامه
انا "فى سرى" : يابن التيت بقى بتحلقلى يا واطى , وانتى اتخرستى مفيش اى كلمه ماشى انا الغلطان.. سريرى اولى بيا .
هى: هو انت من العيله ؟؟؟ سورى اصل انا اول مره اشوفك " ومعالم وشها بتوحى انها مستنيه منى رد"
انا رديت فوريره : اه والمصحف الشريف من العيله. وشكرا على كده مفيش كلمه راضيه تطلع منى .
هى ضحكت طبعا على ردى وهو كمان ابن التيت عاش الدور وقعد يمرح مرح ولا مرح بسام الجندى وعلى كمال.
ومكنش ينفع للأسف اقعد لانى من شويه كنت هموت من التعب , روح بقى يا خفيف علشان السرير اولى بيك مش كده يا فقر "طبعا بكلم نفسى"
وادينى سهران والسرير اتخنق منى من كتر ما عمال اتقلب عليه لا راضى انام ولا راضى اقوم واقعد فى الصاله.
وانتهى اليوم الاول بحمد الله..........*

بص يا معلم
كل الحكايه انهم كلهم شباب جامعى فى العشرينات
وهما مش سايبين بيوتهم ولا حاجه
كل الحكايه انهم منفصلين فى شقه فى بيت العيله
اوك؟؟

حلوة حلوة
بس جريئه اوووووووووى البت دى

انا عارف النهاية

ههههههههههههههه
متأكد يا علاء؟؟؟؟!!!!
مظنش
وشكرا لردك يا باشمهندسه

شويه كده , كنت انا اخدت الشاور المحترم ولبست الطقم اياه و حضرت نفسى , وجرس الباب رن , طبعا مى هو فى غيرها ,
مى: يللا انت لسه مش لبست , انت هتأخرنا كده
انا : ثوانى بس وهكون جاهز
مى: يللا بقى , مينفعش كده دى زمان البت مروه مستنيانا من بدرى
انا: وانا مالى انتى اللى لسه جايه , ممكن بقى تسيبينى اكمل
مى: طيب بس بسرعه شويه
مفيش خمس دقايق وكنا نازلين على السلم , وهى ناقص تجرى كأن مروه دى هيخطفوها ,
قولتلها: بالراحه شويه , صاحبتك مش هتطير ولا هيخطفوها
قالتى: بجد !! لما نوصل هتعرف انا مستعجله ليه
وهكذا فضلنا ساكتين لحد ما روحنا المكان اللى المفروض انها هتاقبلنا فيه , وهى ماكنتش موجوده اصلا , قولتلها : هههههه , باين عليها اتخطفت
وهى كانت ورايا ,كان منظرى تحفه خالص , بس انا قولتلها معلش انا كنت بهزر وكده , وهى كان ردها كلمه واحده "عادى"
مى: يللا بقى علشان نلحق نلف شويه وبعدين ندخل السينما
انا فى سرى "ايه الجو ده , سينما !!! وفشار وشكله يوم ترادشونال خالص"
قولتلها : ايه ده انتو ناويين تدخلو السينما ؟؟؟
مروه : اه , اصل فى فيلم حلو وهندى كمان , ولا انت ملكش فى الهندى
قولتلها : لا والله ماليش فى الهندى
قالتلى : مش مشكله , اعتبر نفسك بقى ليك فى الهندى
قولتلها : عادى
هما الاتنين كانو شاغلين رغى , لدرجه انى حسيت انى متطفل عليهم , وانى مكنش لازم اجى من الاساس,والتزمت الصمت المطلق لحد ما مى اخدت بالها
مى: انت مالك ؟؟ هى الخروجه مش عجباك ولا ايه؟
انا : لا ابدا عاجبانى
مى: اومال فى حاجه مزعلاك؟؟؟
انا: لا مفيش حاجه يابنتى , عادى يعنى بس انا حاسس انى مكنش ضرورى انى اجى معاكم لانى ماليش فى الزحمه ولا حتى فى السينما
مى: معلش دلوقتى تفك من الخنقه دى ,وبعدين احنا بلف علشان ميكونش فى ملل
مروه: انت شكلك بتحب القعده والكلام ده
انا: اه معاكى حق , اصل انا انسان تقليدى جدا
مروه: مش قصدى
انا: عادى
مى: صلو عالنبى يا جماعه
انا: عليه الصلاه والسلام
مروه: عليه افضل الصلاه والسلام
مى: ايه الليله مالها ؟؟؟ عايزين نفرفش وكده
انا : يا جماعه انا اسف , انا حاسس انى مخنوق شويه وبس , مش قصدى حاجه ومعلش لو كنت غلس معاكى يا مروه
مروه: انت مش غلس انت رخم
بصيتلها وكنت هاكلها , بس اخدت بالى انها بتهزر
انا: ماشى يا ست مقبوله منك هههههههههههه
مى: ايوه كده خلو الليله تبقى تمام ,ايه رأيك ناخد جنب ونلعب اى حاجه
انا: نلعب !!!!!!! ايه مثلا استوغمايه ولا مسّاكه؟؟؟
مى: نلعب لعبه الصراحه "بوتيل"
مروه: اشطه جدا
انا: يعنى ايه مش فاهم
مى: يعنى اللى تيجى على البوتيل يتسأل من التانيين ولازم يجاوت
انا: لا انتو كده هتعملوا عليه حلف
مروه: وايه يعنى ما انت كمان هتسأل ولا انت خايف
مى: لأ ده مكسوف هههههههههه
انا: انا مش بخاف ولا بتكسف , بس دى لعبه شكلها ممله
مى: لا صدقنى دى جمليه جربها بس مره
انا: طيب , لما نجرب " انا مش هخسر حاجه"
لفت البوتيل وجات على مروه
مى : ههههه وقعتى ومحدش سمى عليكى , ايه رأيك وبصراحه فى (انا)
مروه بصتلى: مممم , عادى يعنى كلامك عنه كان مدينى فكره واول ما جيت وشوفته افتكرته رخم او غلس , سورى غتيت ههههههههههه , بس بعد كده بدأت اعرف انه طيب وشكله غلبان
انا: لا والله , يمكن!!!!!!!
وجه سؤالى: ايه اخر اخبار مى , يعنى ايه اخر خبر عرفتيه عنها؟؟؟
وكانت الاجابه بجد مفاجأه ليا ولى مى كمان
مروه قالتلى: مفيش يا عم جديد , غير الموضوع بتاعكم وبس , وبصت لـ مى وقالتلها انتى يابت فى حاجه جديده ولا ايه
بس مى كانت متنحه ومش معانا اصلا , وانا الكلمه صدمتنى مش عارف لا اتكلم ولا اسكت

جميل جميل
بس خلصنا بقى ونزل باقى الاجزاء

جميلة جداااااااااااا
وصاحبتها دى تحفة بتفكرنى بحد أعرفه

هو ( أنا ) ده ما اخترعتلوش اسم

ولا اسمه اللي ما يتسمى ؟!

وبحبح ايدك شوية في بقية الاجزاء

ما تنقطناش كل شوية بسطرين تلاتة

حرام عليك هو انا بنقلها
وبعدين علشان كده احسن كان الكلام عليا وانا اللى بحكى وانت ساكت من اول الحكايه وجى دولقتى تفوق
ياعم ده ممدوح لما بينقل بيبقى اقل من كده
وانا لو منك يا م امندا ابدلها بس لو صاحبتك اوى يبقى لازم تتحملى قدرك ههههههههههههههههه
ونورت يا ابو صلاح

هههههههههههههههههههههههههههههه

كمل ياعم حرام عليك

اوعى يكون قصدك عليا يا امندا

ههههههههههههههههههههههه

وجه سؤالى: ايه اخر اخبار مى , يعنى ايه اخر خبر عرفتيه عنها؟؟؟
وكانت الاجابه بجد مفاجأه ليا ولى مى كمان
مروه قالتلى: مفيش يا عم جديد , غير الموضوع بتاعكم وبس , وبصت لـ مى وقالتلها انتى يابت فى حاجه جديده ولا ايه
بس مى كانت متنحه ومش معانا اصلا , وانا الكلمه صدمتنى مش عارف لا اتكلم ولا اسكت
قالت: مالكم فى ايه .؟؟؟!! , هو انا خبطت ولا ايه يا مى
ضحكت انا علشان الموقف يعدى وميكونش فى احراج, وقولتلها "لا ابدا , بقولكم ايه اللعبه دى مش هنخلص منها ولا ايه؟؟ وبعدين , مش قولتو ان فى فيلم "
مى: اه صحيح , احنا يادوب نلحق الفيلم , والا هنضطر نخلى حد يحكيه لينا
مروه: طيب يللا ,والتفتت لـ مى : هو فى ايه ؟؟؟ ايه اللى حصل؟؟؟
مى مش ردت عليها كل اللى عملته نظره , كان معناها "انتى خربتى الدنيا وهتشوفى"
دخلنا الفيلم , قعدنا جنب بعض انا على الطرف , وبعدين مى طبعا وجوه جنب واحده كده قعدت الست مروه
الفيلم بدأ ومروه اندمجت فيه , وانا بما انى ماليش فى حاجه اسمها هند مكنتش مركز اوى , بس لاحظت ان مى مركزه معايا , التفتت ليه وقولتلها : واضح انك ملكيش فى الهندى زى حلاتى
مى: اه , بس احيانا بحب اتفرج عليه الهندى , لكن بصراحه النهارده مش عايزه
انا:ممممممممم ,مع انه شكله فيلم حلو
مى: مش مهم , كنت عايزه اقولك على حاجه بخصوص ...
انا: مش وقته خالص الكلام فى اى حاجه , بعدين نبقى نتكلم , يللا حاولى تتفرجى على الفيلم
مى بصت ليا وسكتت , وبعدين بصت قدامها , السكوت استمر لحد ما جه وقت بريك فى نص الفيلم تقريبا , ومروه خرجت علشان عايزه تجيب فيشار وبيبسى وكلام فاضى من ده
مى: ممكن بقى نتكلم دلوقتى؟؟؟
انا: اه طبعا
مى: على فكره اللى حصل ده , انت فهمته غلط والله العظيم انا مكنش قصدى احرجك ولا ....
انا: بس انا متحرجتش وعادى يعنى
مى: يعنى ايه عادى , انت مزعلتش من الكلام ؟؟؟!!!
انا: وازعل ليه يعنى ؟؟
مى: انت مالك بتتكلم كده ليه؟؟ عموما انا اسفه ,واضح انك مش عايز اصلا تسمع صوتى
وقامت ولسه هتمشى , مسكت ايديها وقولتلها: انتى رايحه فين ؟؟؟ ,وبعدين سيبت ايديها وقولتلها : اسف انى مسكت ايدك كده
بصيتلى باستغراب وقالتلى: انت عايز ايه؟؟؟؟
قولتلها: يعنى ايه عايز ايه؟؟
مى: يعنى انت بميت حاله , مره احس انك مش طايقنى ومره احس انك عايزنى جنبك ومش فاهمه حاجه
انا: مين اللى قال انى مش طايقك , .......... بالعكس انا عايزك على طول جنبى "ايه اللى انت بتهببه ده"
مى بصت ليا باستغراب وقالتلى: بجد !!!!!!! ,ممكن اسألك سؤال؟؟
انا: اتفضلى طبعا
مى: مين اللى انت معجب بيها؟؟؟
سكت شويه , ومش عارف اقولها ولا لأ , قررت انى اعمل زى ما احمد قاللى
انا: انتى يا مى و...... "لسانى اتخرس"
ابتسمت مى وفضلت باصالى وقالت بصوت واطى اوى: كنت عارفه
انا عايز اعرف طيب انا اعترفت باللى جوايا , ايه مصيرى دلوقتى وهى سكتت ليه , حسيت بخنقه وندمت انى اتكلمت
فجأه مى بصت ليا وقالت : انت عارف ان احمد ولا اى حد منهم معاه رقمى؟؟
انا قولت ايه اللى جاب احمد دلوقتى
مى: بتفكر فى ايه؟؟؟ لسه مفهمتش !!!!!!!!!
انا: لأ , بس ...... بصراحه مش فاهم تقصدى ايه
ضحكت وقالتلى : ولا حاجه , تعرف مروه دى حبت انسان , من اول ما شافته وهى معجبه بيه , بس المشكله انه تقريبا كده مش واخد باله , مع انه المفروض انه يعرف , لانها بتعامله غير اى حد تانى وكمان ...
انا: ده انسان غبى, سورى فى اللفظ
مى كملت : دى حتى طلبت منه انه يخرج معانا ...... النهارده
انا: ومجاش ليه
مى: اووووووووووووووف ...... انت ايه ؟؟؟ ياعم والله العظيم بتكلم عليك انت انتااااااااااااااااااااااااااااااااا..... انا بحبك انت فهمت ولا لسه!!!!!!!!!!!
فضلت متنح ولا عارف اقول ايه , اصلا انا مش متاكد ان كنت سمعت الكلام ده , ولا انا عايز اسمعه
مى: انت يابنى .............. استغفر الله العلى العظيم
انا: نعم
مى: نعم الله عليك .... انا قولتلك انى بحبك
انا: انا؟؟!!!!
عينيها كانت هطق شرار , بسرعه قبل ما تنفجر فيا: اقصد وانا كمان ....... أأأأأ بحبك
مى: بتقول ايه؟؟؟
انا : ................... بحبك يا مى ايه مش بتسمعى
ضحكت مى :اخيرا , لا بسمع والله
________________________________________________________________________________________

تفتكروا حاجه زى دى ممكن تحصل , ولو حصلت ممكن تكمل ؟؟؟؟؟

ايه ده ؟!

كده ذا اند ؟!

ولا لسه في تاني ؟!

ولو دي النهاية يبقى نهاية مباغتة وسريعة و انا ما اتوقعتهاش خاااااااااالص

انا قلت لسه شوية

مش كده ؟!
في تاني ؟!

لا مفيش تانى
القصه نهايتها شبه مفتوحه
وانا سألت
هل الكلام ده ممكن يحصل ولا اخره كده يتكب ويتقرأ؟؟؟؟
ولو ينفع يحصل تفتكروا حاجه زى دى ممكن تستمر وتتحول فى يوم لارتباط؟؟؟؟؟

قصه حلوه اوى يا نشوان
بس صعب جدا يحصل فى الجو اللى احنا فيه
بس ممكن يحصل فى الجامعات التانيه زى القاهره وحلوان وعين شمس والدنيا اللى هناك دى
انما فى الفيوم استحااااااااااااااااااااااااااااله

بس اذا جيت بقى للصح
هى غلط اللى بتعمله ده ومش طبيعى ابدا
والبطل ده عيل خرنج وتعبان طينه ومش بيعرف يتكلم وبيفكرنى بواحد صاحبى اوووووى انا وانت بس الى عارفينه مش بيعرف يستغل الفرص ومش بيعرف يفتح حوارات

انت مالك متعصب اوى كده من البطل
سبحان الله هو كده يا عم غلبان
هههههههههههههههههههههههههههه
اما بقى تصرفاتها
انا شوفت ناس ممكن يعملوا كده واكتر واعتقد ان فى الفيوم عينات قليله من النوعيه دى
عموما حلو انها عجبتك
بس انت هدى اع..... قال خرنج قال قصه مختلفه شويه - صفحة 2 Icon_lol

جاااااااااااااااااااااااااااامده جدااااااااااااااااا

بس ماعتقدش انها ممكن تحصل او تحصل بس مش بالسرعة اللي حصلت في القصة

اهلا
موستا بحاله معايا والقصه عاجباه كمان
يانهار
هههههههههههههههه
نورت يا عم الحج
وشكرا على رأيك

اعتقد ان ده بيحصل طبيعي جدا وحالات متكررة جدا بس لناس منفتحة اكتر من اللازم

زي مثلا القاهرة ومحافظات الوجه البحري

انما الصعيد فاعتقد انه اقل

و عن اذا ما كان ممكن انه العلاقة دي تتحول لارتباط فده جايز جداااااااا ومفيش اي مشكلة بشرط صدق الطرفين في العلاقة دي

رؤيه جديده
ومستغرب انها منك انت
ههههههههههههههههههههههههه
شكرا يا معلم

القصه جميله
ومعلش ماعرفتش اكملها اليومين اللى فاتوا
اما عن انها ممكن تكمل فا هى ممكن تكمل ويحصل
والاعجاب ممكن ينتهى بارتباط اكيد
بس مش عارفه ممكن يتقلب فى ثوانى بسرعه كده لحب ولالا بس ما اعتقدش
اما عن حاله القصه فانا شايفاها واقعيه ويمكن محاكيه لقصص الافلام اللى بنشوفها على الرغم من انها اكثر واقعيه من الافلام اللى بنشوفها
قصه جميله نتمنى نشوف قصص تانيه زيها هنا
عندى بس طلب اخيييييييير صغيييييييير

ياريت لو سمحت تغير عنوان القصه لاسم معين
بدل قصه مختلفه شويه

شكرا على ردك
بس انا مش عارف اسميها ايه
هو ده الاسم اللى جه على بالى
لو عندك اسم يبقى كتر خيرك

برنس يا نشوان

ولغايه دلوقتى ماشية معاك زى السكينه فى الحلاوة

هو ده رأيك فى القصه
وتخليك لحدوثها من عدمه !!!!!!!!!!
ولا انا برد فى موضوع غلط ولا انا مين
الله يسامحك يا جيمى Shocked

ههههههههههههههههه

الله يسامحك يا جيمي

اه علشان الحاجات دى بتحصل

بس مش بالسهوله دى يعنى

بس انت اسلوبك امتر من رائع والله

بس انت شكلك واقع وبتدور على حاجه

ولا ايه

والمفروض تكمل بعد كدة هيعمله ايه

» فتاه مختلفه