كرسى الاعتراف

تذكير بمساهمة فاتح الموضوع :

الموضوع اسمه كرسى الاعترااف



ايه فكره الموضوع ..


فكره الموضوع ان كل فتره هيكون فى ضيف على كرسى الاعترااف .



وباقى الاعضاء كل واحد فيهم يساله كل الاسئله اللى كانو يتمنو او يحبو يعرفو اجابتها منه

على سبيل المثال

يعرفنا بشخصيته ... هوايته .. حكمه مفضله ليه ومؤمن بيها اوى

حكمه مشهوره هو معارض عليهاا .. ورده معاه يهديها لمين فى المنتدى

يتمنى ايه لمنتدى اصحابنا .. وكده مثلا ..

وأى اسئله تانيه ..
وبعد كده يختار عضو يجي يقعد علي الكرسي ..علشان يتسأل ..
ويبعتله رسالة علشان العضو يعرف إن قعد علي الكرسي .


اتمنى الموضوع يكون لذيذ ويعجبكو وتوافقو عليه ...

وعلى فكره الموضوع ده والله بشوف فى باقى المنتديات الردود فيه بتعدى ال100 لكل عضو

والاسئله بتكون كتيره اووووووى

وانا اللى عجبنى فيه انى حسيت انه بيقرب الاعضاء من بعض .. بحيث ان كل عضو بيكون عارف عن غيره حاجات كتيره اوى

عشان كده اتمنى تشاركو فى الموضوع ونختار مين هيكون اول عضو معاناا .. على كرسى الاعتراف

يلا بقى واحد يتبرع ويقعد على الكرسى لايما كل عضو يرشح واحد واكتر واحد يقعد على الكرسى

اهلا بيك يا ابوطه حبيبى قلبى

1-ايه رايك فيا مميزات وعيوب لو انت شايف فيا حاجه قولها؟؟
2-ايه رايك بصراحه فى (على كمال\ بسام )؟هههههه
3-اول حرف من البنت اللى انت اعجبت بيها ؟؟
4-هى فى كليه ايه ؟؟
5-ايه رايك فى الدفعه بتاعتنا كلها (ولاد وبنات) ؟
6-اوصف نفسك باربع مميزات فيك؟؟
7-ترشح مين (مبارك ولا جمال مبارك ولا البرادعى ولا عمر سليمان) ؟
8-ايه رايك فى الاخوان والمظاهرات اللى بيعملوها فى الجامعه؟؟
9-ايه اكتر حاجه بتكرهها فى الكليه ونفسك تغيرها؟؟
10-ايه رايك فى علاقات الحب قبل 3 او 4 سنين من التخرج؟؟
11-ايه اكتر اكله بتحبها ؟؟
12-عملت ايه فى ماتشك فى الدوره النهارده؟؟

كفايه كده لحد ما افكرلك فى حاجات تانيه

اسمع بقى يا معلم

1- اسمك بالكامل ؟ والدك ووالدتك بيشتغلوا ايه ؟
2- ترتيبك بين اخواتك ؟ وعددهم مفصلا نوعهم وفي سنة كام ؟
3- عندك كام عم وعمة ؟ كم خال وخالة ؟
4- اسم صديق حياتك ؟ ولاي مدى ممكن تضحي عشانه ؟
5- طموحك ايه في الحياة ؟
6- ايه اعلى مرتبة نفسك توصلها قبل ما تموت سواء علميا و سياسيا و اجتماعيا ؟
7- تفتكر ممكن تخدم بلدك ودينك ازاي ؟
8- كان نفسك تكون حاجة غير مهندس ؟
9- لو اقسام هندسة كلها كانت موجودة في الفيوم كنت اخترت حاجة غير كهربا ؟ ايه هيا ؟
10-عندك تعليق ع شخصيتي ؟ طلعلي كل عيوبي واختصر لو فيا مميزات
11-ايه اكتر المواقف صعوبة اللي عدت عليك في حياتك ؟ واتصرفت ازاي ؟
12-ايه الحاجات اللي فرحتك من بداية حياتك لحد دلوقت ؟
13-والاخير : راضي عن نفسك ؟ وواقع بلدك ؟ ودينك ؟ وليه ؟

معلش الاسئلة مش بالترتيب
واسف ع الاطالة بس ابو طه حبيبي وعايز اعرف دماغة شغالة ازاي

تقبل مني فائق احترامي

ياجماعة هوا الاخ اللى انتوا رشحتوه مش جاوب ليه

انا عايزة اوجه كمية اسئلة

لو هيجاوب يقول

وثانكس جزيلا

هيجاوب ان شاء الله
هو اكدلى بكده هو بس كان مستنى وقت فاضى (يوم الخميس ) عشان الاسئله كتيره ومحتاجه قاعده
يعنى لو عندك اسئله قوليها دلوقتى

آسف يا جماعة ع تاخير الرد و شكرا لعبده لتوضيحه وجهة نظري وبعدين انا اسمي احمد مش اخ
وبالنسبة للاسئله
1-ايه رايك فيا مميزات وعيوب لو انت شايف فيا حاجه قولها؟؟
بالرغم اني ماعرفكش من زمان لكني ما شوفتش منك حاجه وحشه و الواضح انك راجل جدا و يعتمد عليك. اما بالنسبه للعيوب انا شايف ان النكت الخنيقة بدات تكتر منها ههههههه.وسرعة كلامك انا ماشوفتش حد بياكل الكلام زيك كده ...... وده بصراحة والله
2-ايه رايك بصراحه فى (على كمال\ بسام )؟هههههه
انا حاسس انهم فعلا رجاله لكن الهزار الكتيييييييير اللي بيقلب بهيافة زياده عن اللزوم هو ده عيبهم الاساسي بس غير كده هما تماااااااااااااام
3-اول حرف من البنت اللى انت اعجبت بيها ؟؟
س
4-هى فى كليه ايه ؟؟
بلاش
5-ايه رايك فى الدفعه بتاعتنا كلها (ولاد وبنات) ؟
عادي يعني فيها الكويس و الوحش فيها جماعة دحيحه و فيها ناس ضايعة .. مفيش جديد يعني
6-اوصف نفسك باربع مميزات فيك؟؟
لا دي صعبه شويه اسيبهالك انت وياريت تقولهملي في رد كده على جنب
7-ترشح مين (مبارك ولا جمال مبارك ولا البرادعى ولا عمر سليمان) ؟
مش عارف عايز البرادعي عشان التغيير بس هل التغيير ده هيبقى ف صالح و لا ضد...مش عاااااارف
8-ايه رايك فى الاخوان والمظاهرات اللى بيعملوها فى الجامعه؟؟
انا شايف انهم عايزين يبقى ليهم راي و مشاركة في امور الجامعة بس بيتهيالي ان مفيش حد متجاوب معاهم فبيعملوا اللي بيعملوه ده
9-ايه اكتر حاجه بتكرهها فى الكليه ونفسك تغيرها؟؟
مش مهتمين بالتطبيق العملي و ميل الدكاتره للكلام النظري اكتر وقليل لما بيربطوه بشغلنا كمهندسين مستقبلا .. يعني بيشغلو بالهم اكتر بالماده العلميه و ازاي يوصلوها للطلبه مش مدى استفادتنا بيها كمهندسين
10-ايه رايك فى علاقات الحب قبل 3 او 4 سنين من التخرج؟؟
الموضوع ده انا ليا راي فيه يطول شرحه. بس بالنسبه ليا مش عايز امر باي تجارب عاطفية الا لما اوصل لمرحله اني اقدر اسعد اللي بحبها و يبقى في حاجه رسميه بينا واظن الكلام ده مش دلوقتي خااااااااااالص يعني مش قبل التخرج خالص طبعا
11-ايه اكتر اكله بتحبها ؟؟
المحشي بانواعه و الكشري من ايد الحاجه عندي
12-عملت ايه فى ماتشك فى الدوره النهارده؟؟
انا اتاخرت في الرد فالماتش مش يعتبر النهارده .. اتغلبنا واحد و اللي غلبونا لاعبو فريق لملوم وغلبوهم بردو .. بس ده مش مقياس خااااااااااااالص لان الوقت قصير لو دخل جون فيك مش هتلحق تعوضه و الناس الاحتاطي عايزين يلعبو وبالتالي مش بنبقى مركزين اوي. ده غير قوانين حماده جوهر العجيبه

انا اسفة لو حضرتك زعلت يابشمهندس احمد

انا بقول الاخ

يعنى المفروض هنا كلنا اخوات

وطبعا بردو هوجه اسئلتى بس لما اتاكد ان حضرتك مش زعلان

لا احمد مش بيزعل ولو زعل يتفلق ولا يهمك سيبك منة ههههههههههههههههههههه
بس هو احمد طبيعتة كدة
وانا هسال
هى الساعة كام دلوقتى

البشيهي حبيب الملايين .. انت بتنتقم يا معلم ولا ايه هههه
- اسمك بالكامل ؟ والدك ووالدتك بيشتغلوا ايه ؟
احمد محمد طه خالد محمد . والدي متوفي كان شغال محاسب و كان عنده شركة مقاولات ربنا يرحمه.والدتي ربنا يخليهالنا مدرسة علوم اعدادي
2- ترتيبك بين اخواتك ؟ وعددهم مفصلا نوعهم وفي سنة كام ؟
انا الكبير و البلطجي هههههه.عندي 3 اصغر مني طبعا
طه في 2 ثانوي. ادعيله
واختين بنات 3 اعدادي و 1 اعداي
3- عندك كام عم وعمة ؟ كم خال وخالة ؟
3 اعمام و عمتين و 4 خيلان و خاله واحده
4- اسم صديق حياتك ؟ ولاي مدى ممكن تضحي عشانه ؟
انا عندي اصحابي اللي عارفهم كلهم سواء. مفيش صديق حياتي ده. هو في ناس بس قريبين مني اكتر و تفاصيلي معاهم وكده. اما بالنسبه للتضحيه مش عايز اهيص عليك لاني مش عايز اقولك اني اضحيله بكذا وانا ماقدرش اعمل كده. اهم حاجه لما يطلب مني حاجه اقدر انفذها او لو اعتمد عليا ف حاجه معينه خناقه مثلا. ههههههههههه
5- طموحك ايه في الحياة ؟
يكون ربنا راضي عني اولا و اخيرا. واقدر اسعد امي واخواتي بحكم اني الكبير. واكون ناجح في دراستي و مستقبلي القريب ان شاء الله و ف شغلي. ده اذا كان لينا عمر طبعا
6- ايه اعلى مرتبة نفسك توصلها قبل ما تموت سواء علميا و سياسيا و اجتماعيا ؟
مش حاجه معينه اكتر من اني ابقى ناجح في حياتي الدينيه و العمليه و الاسريه
7- تفتكر ممكن تخدم بلدك ودينك ازاي ؟
اني ابقى مجتهد في المجال اللي انا فيه عشان اتميز فيه و اقدر اخدم ديني و بلدي بجد
8- كان نفسك تكون حاجة غير مهندس ؟
لا انا شايف انها انسب حاجه ليا. وكمان كلام والدي الله يرحمه عن انه كان عايزني ادخل هندسه محسسني ان مفيش حاجه تانية كانت هتبقى مناسبه ليا
9- لو اقسام هندسة كلها كانت موجودة في الفيوم كنت اخترت حاجة غير كهربا ؟ ايه هيا ؟
لا مش عارف لاني ماقدرش اقولك الا اذا كنت عارف كل قسم بتفاصيله الاول وايه اللي ممكن يناسبني
10-عندك تعليق ع شخصيتي ؟ طلعلي كل عيوبي واختصر لو فيا مميزات
راجل تمام و مجتهد و متعاون و معاك ارقام موبالات الدفعة كلها هههههههههه. عيوبك انا ماشوفتش منك حاجه وحشه اوي ممكن تفضل معلقه في بالي علطول عشان كده انا مش مجمع عيب معين ليك دلوقتي
11-ايه اكتر المواقف صعوبة اللي عدت عليك في حياتك ؟ واتصرفت ازاي ؟
يمكن يوم ماقولت لوالدتي نتيجة الترم ده لاني اول مره اعرف الكلام ده و كمان مش مستوايا و مش دماغي يعني انت عارف لو واحد مستواه مش قد كده بيبقى عادي بالنسبه له لو جاب درجات تعبانه او نزل في مواد لكن انت لما تبقى عارف دماغك تجيب لحد فين و مستواك وسط اصحابك ازاي تتضايق جدا لو حصل مشكله في دراستك و غيرك اقل منك علميا و جاب درجات عنك.انا يوم النتيجه ده اول مره ابقى مش عايز اروح البيت عشان مش لاقي وش اكلم بيه امي و قرايبي اللي هيسالوني عملت ايه. بس جات فرصه كان اخواتي مش ف البيت قولتلها و طبعا اتصدمت و بكت بس حاولت اهديها على قد ماقدرت
12-ايه الحاجات اللي فرحتك من بداية حياتك لحد دلوقت ؟
يمكن تميزي ف الدراسه سابقا. اذا حصل موقف يبسط غيري بالذات من العيله بفرح له انا كمان. الكووووووووره و المنتخب و الزمالك و برشلونه... لما بيكسبو طبعا
13-والاخير : راضي عن نفسك ؟ وواقع بلدك ؟ ودينك ؟ وليه ؟
انا تعبت يا عم ايه ده كله الكيبورد اشتكى. مش راضي عن نفسي علطول يعني ف مواقف معينه بلوم نفسي طبعا. البلد يعني. الدين خالص. والاسباب واضحه للجميع مش محتاجه تفسير مني

the princess كتب:

انا اسفة لو حضرتك زعلت يابشمهندس احمد

انا بقول الاخ

يعنى المفروض هنا كلنا اخوات

وطبعا بردو هوجه اسئلتى بس لما اتاكد ان حضرتك مش زعلان

لا تمام مفيش مشاكل

هى اللعبه نامت ولا ايه؟؟؟؟؟؟؟؟؟؟؟

اه شكلها كده

فين طه يرشح حد بعده ؟؟؟؟؟؟؟

يعني خلاص .. قضيت معايا على كده ؟
نسيب فرصة كمان لحد بكره يمكن الناس تشاور عقولها و تسال قبل ما ارشح حد

طالما مش زعلان نزعلك بقا قصدى نسالك
هههههههههههههههههههه

اكتر عضو او عضوة ف المنتدى مش بتحبه او مش بتستريحله ؟

ناوى على بور ولا اتصالات ؟ولماذا ؟

ايه مواصفات فتاة احلامك ؟

حبيت بنت قبل كدة او اعجبت بواحدة ؟

وياترى ايه احوالك العاطفية الان ؟

ايه رايك ف مهرجان الصور اللى نتعلق ف مدنى بتاع الفن التشكيلى ؟

ومهرجان الاخوان والصور اللى معلقينها ؟

عبر عن شعؤرك تجاه المسجد الاقصى وما يحدث الان ف فلسطين بكل صراحة ؟
وكفاية كدة

ياريت مكنش رخمت اوى

طه حبى انا بقى الخاتمة

1- ايه رايك فيا ؟؟

2- انت شايف نفسك ازاى؟؟

3- لو قالولك فى طوفان وتاخد حاجة واحدة بس غير المصحف من بيتكم هتختار ايه؟؟

4- ايه المكان اللى تتمنى تروحه؟؟

5- تحب تشتغل فى دولة عربية ولا اجنبية؟؟

6- شايف انى بعرف العب كورة وان مكانى فى الدورى الانجليزى ولا لا؟؟

7- ايه رأيك فى النكت والفوازير بتاعتى؟؟
ههههههههههههههههههههههه


شكرا لابو طه حبيبى والله

ونمسى على احمد طه ونقول الوووووووووووووو
1.ايه رايك فيا؟؟
2.ايه اكتر موقف محرج اتعرض ليه فى حياتك؟؟
3.ايه الموقف اللى حصل معاك وتحب انه يتكرر تانى؟؟

وكفاية كده عليك يامعلم

* اوصف لنا شخصيتك زي مانت شايفها ؟؟؟؟؟؟؟؟؟
يا جماعة انا قلت قبل كده مش هينفع اقول حاجه عن نفسي . مفروض حد يعرفني هو اللي يحكم على شخصيتي
* ايه هوايتك المفضله ؟؟؟؟
الكوره ممارسه و متابعة, الجيم , النت
* مين مطربك المفضل واجمل اغنيه بتسمعها و احلي فيلم شوفته ؟؟؟؟؟؟؟؟
طبعا الهضبه عشقي الابدي و مالهوش نظير عندي. الاغاني المفضله كتير بس ابرزهم لعمرو طبعا و هم قصاد عيني , وماله , صدقني خلاص . والافلام عربي الفرح و اجنبي تايتنك
* بتحب تقضي اغلب وقتك في البيت ولا مع اصحابك؟
وسط بين الاتنين مش اغلب وقتي مع حد فيهم
* ايه اكتر مكان بتحس انك بترتاح فيه ؟؟؟؟؟؟؟
حسب الموود اللي انا فيه . اذا كانت الامور تمام يبقى مع اصحابي في الكليه او بره البيت او مع اخواتي و امي ف البيت . اذا كنت مخنوق يبقى ف مكان لوحدي مع نفسي .... كده يعني
* اجمل منظر تحب تشوفه ؟؟؟؟؟؟؟
الغروب و الاختفاء التدريجي للشمس
* ماهو هدفك في هذي الحياة ؟
جاوبت قبل كده
*صفه فيك تحبها؟
بحب اصحابي و بقدر اوي الرجاله بجد
*صفه فيك تكرهها ؟
اوقات مابقدرش الامور صح
*اكثر شئ يعصبك؟
المواعيد اللي بتتضرب يعني اللي يتفق معايا على معاد و يخلفه
*اكثر شئ يخوفك؟
لما اعمل حاجه غلط و اتدارى من غلطي ده مع اني عارف ان لو الناس حولي ماعرفوش ربنا عارف و اكيد هايعاقبني
*تجربه مريت بها وتحب انك تكرره
مش حاجه معينه . اي موقف كويس او تجربه سعيده مريت بيها عامة ف اي وقت احب انها تتكرر
*باقة ورد لمن تهديها ؟
لامي
*باقة شوك لمن تهديها ؟
لكل اللي في مركز عالي و بيتكبر على الناس
*أعظم شيء فقدته ؟
والدي الله يرحمه
*-وأعظم جرح دفنته ؟
لا تقريبا مفيش
* اسوأ خبر سمعته ؟؟؟؟
وفاة والدي
*اكثر شئ اتندمت عليه؟؟؟؟؟؟؟
ده تالت سؤال بنفس الهدف ... وفاة والدي والسبب في التلات اسئله هو اني كنت هاستفيد منه كتير وكان وجوده هيغير حاجات كتير اوي ف حياتي
* عضو بتحترمه ع المنتدي وعضو غامض وعضو تهديله بوكيه ورد ؟؟؟؟؟؟؟
انا مش متابع الاعضاء كلهم بس اصحابي الموجودين اللي عارفهم كلهم حبايبي واللي اعرفهم من خلال الردود و المنتدى زي حضرتك بحترمهم جدا و بقدرهم
اكتر سوره في القران بتحب تسمعها ؟؟؟؟؟؟؟
الكهف

انا والله مش بعرف ازعل من حد ممكن اخد موقف في ساعتها لكن بعد كده مفيش مشاكل خالص .. انا حبيت اوضح بس

اكتر عضو او عضوة ف المنتدى مش بتحبه او مش بتستريحله ؟
قلت قبل كده: انا مش متابع الاعضاء كلهم بس اصحابي الموجودين اللي عارفهم كلهم حبايبي واللي اعرفهم من خلال الردود و المنتدى زي حضرتك بحترمهم جدا و بقدرهم

ناوى على بور ولا اتصالات ؟ولماذا ؟
يعني هو لغاية دلوقتي باور بس ربنا يقدم اللي فيه الخير ان شاء الله و هيكون في استخاره اخر السنه وربينا يسهل باذن الله

ايه مواصفات فتاة احلامك ؟
اولا و اهم حاجه اخلاقها و اهلها . ثانيا الجمال . ثالثا المستوى العلمي . رابعا تكون ست بيت بجد

حبيت بنت قبل كدة او اعجبت بواحدة ؟
قولت قبل كده مش حب بجد مجرد اعجاب

وياترى ايه احوالك العاطفية الان ؟
مش مهتم حاليا

ايه رايك ف مهرجان الصور اللى نتعلق ف مدنى بتاع الفن التشكيلى ؟
هو فكرته جميله جدا بس مش مكانه عندنا ف الكليه و بالذات في مبنى مدني مش مناسب خالص كان انسب يبقى ف عماره

ومهرجان الاخوان والصور اللى معلقينها ؟
هو هدفهم منه كويس جدا و ياريت يفضلوا ع اسلوبهم ده ما يخرجوش بره الاطار الكويس ده

عبر عن شعؤرك تجاه المسجد الاقصى وما يحدث الان ف فلسطين بكل صراحة ؟
شعور العاجز عن فعل شئ لاني زي اغلب الناس ما امتلكش الا الدعاء مش اكتر من كده

- ايه رايك فيا ؟؟
انا قلت قبل كده هزارك كتييييييييييييير و بيقلب بتهييف زياده عن اللزوم بس متاكد ان ده ساعة الهزار لكن ساعة الجد انت راجل و جدع .. صح كده ولا ايه

2- انت شايف نفسك ازاى؟؟
يا جدعان قلت مش هارد عالسؤال ده . انتوا تجاوبوني عليه

3- لو قالولك فى طوفان وتاخد حاجة واحدة بس غير المصحف من بيتكم هتختار ايه؟؟
ههه طوفان . ربنا يبعد عنا . بس لو هاخد حاجه واحده يبقى وداع امي و اخواتي

4- ايه المكان اللى تتمنى تروحه؟؟
مكه و المدينه

5- تحب تشتغل فى دولة عربية ولا اجنبية؟؟
عربيه طبعا و ياريت ف مصر بس الانسب هاسعى وراه ان شاء الله

6- شايف انى بعرف العب كورة وان مكانى فى الدورى الانجليزى ولا لا؟؟
الدوري الانجليزي اه . عسل ياد يا علي . بس انت بتأدي في الملعب و حريف مشكلتك بس مش بترجع تدافع لما الكورة بتتقطع وانت متقدم

7- ايه رأيك فى النكت والفوازير بتاعتى؟؟
مانا قولتلك عسل ياد يا علي . وانت عارف و بتشوف ردود الافعال بعد كل نكتة

1.ايه رايك فيا؟؟
راجل زي الفل و هادي الى حد ما ومتواضع و بتذاكر في الخباثة يا خبيث
هههههههههههه
2.ايه اكتر موقف محرج اتعرض ليه فى حياتك؟؟
مش مجمع موقف معين . بس هو ممكن لما حد بيحرجني قدام الناس هي دي اللي بتضايق منها شوية
3.ايه الموقف اللى حصل معاك وتحب انه يتكرر تانى؟؟
جاوبت قبل كده

يلا يا وااااااااااااااااد
رشح الضحيه اللى بعدك

ايه المفاجأه دى يا طه
هههههههههههههههه

مش مهم انا على اتم الاستعداد للاسئله

جالك الموت يا تارك الصلاة

استنى عليا بقى وهتشوف اللي عمرك ما شفته


هاااااااااااهااااااااااااهااااااااااااا